ເຄຫາ-ບໍລິການ

  • ປະຫວັດຄວາມເປັນມາຫ້ອງການຄຸ້ມຄອງເຄຫາ

ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ຕາມ​ດຳ​ລັດ​ຂອງ​ນາ​ຍົກ​ລັດ​ຖະ​ມົນ​ຕີ​ສະ​ບັບ​     ເລກ​ທີ 169/ນຍ, ລົງວັນ​ທີ 4 ພະ​ຈິກ 2003 ດຳ​ເນີນ​ການ​ຈັດ​ການ​ຮຽນ-ການ​ສອນ ພາຍ​ໃຕ້​ການ​ນຳ​ພາ​ຂອງ​ຜູ້​ອຳ​ນວຍ​ການ ລວມ​ມີ 2 ຫ້ອງ​ການ ຄື: ຫ້ອງ​ການ​ບໍ​ລິ​ຫານ ແລະ ຫ້ອງ​ການ​ວິ​ຊາ​ການ; ວຽກ​ງານ​ຄຸ້ມ​ຄອງ​ເຄ​ຫະ​ສະ​ຖານ​ໃນ​ນາມ​ເປັນ​ພະ​ແນກ​ເຄ​ຫະ-ບໍ​ລິ​ການ ຕາມ​ຂໍ້​ຕົກ​ລົງ ສະ​ບັບ​ເລກ​ທີ 441/ຈ​ຕ.ມ​ສວ, ລົງ​ວັນ​ທີ 14/6/2004 ພາຍ​ໃຕ້​ການ​ຊີ້​ນຳ​ຂອງ​ຮອງ​ຫົວ​ໜ້າ​ຫ້ອງ​ການ ທ່ານ ທອງ​ສຸກ ພົງ​ສະ​ກຸນ. ​ມາ​ເຖິງ​ປີ 2007 ຫ້ອງ​ການ​ຄຸ້ມ​ຄອງ​ເຄ​ຫາ​ໄດ້​ຮັບ​ການ​ສ້າງ​ຕັ້ງ​ຕາມຂໍ້​ຕົກ​ລົງ​ຂອງ​ອະ​ທິ​ການ​ບໍ​ດີ​ວ່າ​ດ້ວຍ​ໂຄງ​ປະ​ກອບ​ການ​ຈັດ​ຕັ້ງ​ຂອງ​ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ, ສະ​ບັບ​ເລກ​ທີ 1842/ມ​ສ, ລົງ​ວັນ​ທີ 1/11/2007 ໂດຍ​ແມ່ນ​ທ່ານ ທອງ​ສຸກ ພົງ​ສະ​ກຸນ ເປັນ​ຫົວ​ໜ້າ​ຫ້ອງ​ການຄຸ້ມ​ຄອງ​ເຄ​ຫະ​ສ​ະຖານ-ບໍ​ລິ​ການ ລວມ​ມີ 2 ພະ​ແນກ: ພະ​ແນກ​ອອກ​ແບບ-ກໍ່​ສ້າງ ແລະ ສ້ອມ​ແປງ ແລະ ພະ​ແນກ​ຄຸ້ມ​ຄອງ​ຊັບ​ສິນ. ມາ​ເຖິງວັນ​ທີ 15/8/2008 ຫົວ​ໜ້າ​ຫ້ອງ​ການ​ຄຸ້ມ​ຄອງ​ເຄ​ຫາ-ບໍ​ລິ​ການ​ ໄດ້​ຄົບ​ອາ​ຍຸ​ອອກ​ຮັບ​ເບ້ຍ​ບຳ​ນານ​ຕາມຂໍ້​ຕົກ​ລົງ ເລກ​ທີ 1853/ສ​ສ.ຈ​ຕ2008, ລົງ​ວັນ​ທີ 5/8/2008. ຫຼັງ​ຈາກນັ້ນ ທ່ານ ໄພ​ວັນ ດວງ​ພະ​ຈັນ​ ໄດ້​ຮັບ​ການ​ແຕ່ງ​ຕັ້ງ​ເປັນວ່າ​ການ​ຮອງ​ຫົວໜ້າ​ຫ້ອງ​ການ​ ຕາມ​ຂໍ້​ຕົກ​ລົງ​ເລກ​ທີ 941/ມ​ສ.ຈ​ຕ, ລົງ​ວັນ​ທີ 16/7/2008 ແລະ ຮັບ​ໜ້າ​ທີ່​ຄຸ້ມ​ຄອງຫ້ອງ​ການ​ຄຸ້​ມ​ຄອງ​ເຄ​ຫາ-ບໍ​ລິ​ການ ​ຈົນ​ມາ​ເຖິງ ວັນ​ທີ 3/7/2013 ທ່ານ​ ສິງ​ທອງ ມະ​ໂນ​ລົດ ຫົວ​ໜ້າ​ພະ​ແນກ​ບໍ​ລິ​ການ-ສ້ອມ​ແປງ ເຮັດ​ໜ້າ​ທີ່​ຮັກ​ສາ​ການ​ແທນ​ຫົວ​ໜ້າ​ຫ້ອງ​ການ​    ຕາມ​ຂໍ້​ຕົກ​ລົງ​ ສະ​ບັບເລກ​ທີ 1213/ມ​ສ.ຈ​ຕ. ມາ​ເຖິງ​ປີ 2015 ທ່ານ ຈັນ ແສງ​ເພັດ ​ໄດ້​ຮັບ​ການ​ແຕ່ງ​ຕັ້ງ​ຕົກ​ລົງ​ເປັນ​ຫົວໜ້າຫ້ອງ​ການ​ຄຸ້ມ​ຄອງ​ເຄ​ຫາ ແລະ ບໍ​ລິ​ການ ຕາມ​ຂໍ້​ຕົກ​ລົງ ເລກ​ທີ 13/ມ​ສ.ຈ​ຕ, ລົງ​ວັນ​ທີ 5/1/2015 ຈົນ​ຖິງ ​ປະ​ຈຸ​ບັນ.

  • ພາລະບົດບາດຫ້ອງການຄຸ້ມຄອງເຄຫາ ແລະ ບໍລິການ

ຫ້ອງ​ການ​​ຄຸ້ມ​ຄອງ​ເຄ​ຫາ ແລະ ບໍ​ລິ​ການ ຂຽນ​ຫຍໍ້ ” ຄບ ” ເປັນ​ກົງ​ຈັກ​ບໍ​ລິ​ຫານ, ມີ​ພາ​ລະ​ບົດ​ບາດ ເປັນ​ເສ​ນາ​ທິການ​ໃຫ້​ແກ່​ອະ​ທິ​ການ​ບໍ​ດີ ທາງດ້ານວຽກ​ງານ​ຄຸ້ມ​ຄອງ​ເຄ​ຫາ ແລະ ບໍ​ລິ​ການ, ເປັນ​ຈຸດ​ໃຈ​ກາງ​ໃນ​ການ​ປະ​ສານ​ງານ ກັບ​ບັນ​ດາ​ຄະນະ​​ວິ​ຊາ,  ຫ້ອງ​ການ,  ສູນ,  ສະ​ຖາ​ບັນ, ຫໍ​ສະ​ໝຸດ ແລະ ການ​ຈັດ​ຕັ້ງ​ຕ່າງໆ​ ຢູ່​ພາຍ​ໃນ ແລະ ພາຍນອກ ມະ​ຫາ​ວິ​ທະ​ຍາ​ໄລສຸ​ພາ​ນຸ​ວົງ ແລະ ພາກ​ສ່ວນ​ຕ່າງໆ​ທີ່​ກ່ຽວ​ຂ້ອງ​ ເຊິ່ງ​ປະ​ກອບ​ມີ 3 ພະ​ແນກ​ຄື : ພະ​ແນກ​ກໍ່​ສ້າງ-ສ້ອມ​ແປງ, ພະ​ແນກ​ຄຸ້ມ​ຄອງ​ຊັບ​ສິນ ແລະ ພະ​ແນກ​ບໍ​ລິ​ຫານ​ຫ້ອງ​ການ.

  • ໜ້າທີ່ຫ້ອງການຄຸ້ມຄອງເຄຫາ ແລະ ບໍລິການ
  • ສຶກສາ​ອົບຮົມ​ແນວ​ຄິດ-​ການ​ເມືອງ​, ຄຸນສົມບັດ ທັດສະນະຕ່າງໆ ໃຫ້​ມີຄວາມເປັນລະບຽບ​ ແລະ ສອດຄ່ອງກັບການປະຕິບັດກົດໝາຍ​ໃຫ້​ພະນັກງານ ໃນການຄຸ້ມຄອງຂອງຫົວໜ້າຫ້ອງການໃຫ້ກາຍ ເປັນຄົນ​ທີ່​ມີ​ອຸດົມ​ຄະຕິ ​ສັງຄົມ​ນິຍົມ, ມີຫຼັກໝັ້ນການ​ເມືອງ, ມີ​ຄວາມ​ຊື່ສັດ, ກາຍ​​ເປັນ​ພະນັກງານຫ້າວຫັນ ​ມີ​ຄວາມຮັບຜິດຊອບ​ຕໍ່ການປະຕິບັດໜ້າທີ່​ວິຊາ​ສະ​ເພາະ ແລະ ວຽກງານ​ທີ່​ໄດ້​ຮັບມອບໝາຍ​ສຳ​ເລັດ​ຜົນ ຢ່າງມີ​ປະສິດທິພາບ​.
  • ສັງ​ລວມ​ແຜນ​, ໂຄ​ງການ​ກ່ຽວ​ກັບ​ການ​ຄຸ້ມ​ຄອງ​​ເຄຫາສະຖານຈາກ​ບັນດາ​ຄະນະ​ວິຊາ, ບັນດາ​ຫ້ອງການ, ຫໍສະໝຸດ ​ແລະ ສູນ​ຕ່າງໆ ​ເພື່ອ​ສ້າງ​ເປັນ​ແຜນ​ລວມ, ຂຶ້ນ​ບັນຊີ, ​ໃສ່​ລະ​ຫັດ​ຊັບ​ສິນ ​ແລະ ກວດກາ​ຕິດຕາມ​ສະພາບ​ຊັບ​ສົມບັດ (ສັງຫາລິມະ​ຊັບ ​ແລະ ອະສັງຫາລິມະ​ຊັບ) ​ຢ່າງ​ເປັນ​ປົກກະຕິ.
  • ຄຸ້ມ​ຄອງ, ວາງ​ແຜນ​ການກໍ່​ສ້າງ​ເຄ​ຫະ​ສະ​ຖານກໍ່​ຄື​ສິ່ງ​ອຳ​ນວຍ​ຄວາມ​ສະ​ດວກ​ເຄຫະສະຖານໃຫ້​ໄດ້ມາດຕະຖານ ​ແລ​ະ ສອດຄ່ອງກັບລະບຽບ​ການ​ທີ່​ວາງ​ອອກ.
  • ຕິດຕາມ​ການ​ປະຕິບັດ​ສັນຍາ​ຮັບ​ເໝົາ​ກໍ່ສ້າງ, ການສ້ອມ​ແປງ​ທີ່​ມະຫາວິທະຍາ​ໄລ​ສຸພາ​ນຸວົງໄດ້​ຮັບການພິຈາລະນາ​​ກ່ຽວ​ກັບ​ການ​ເຊົ່າ, ການ​ສຳ​ປະທານ, ການ​ຕິດ​ຕັ້ງ​ໄຟຟ້າ, ອຸປະກອນ​ໄຟຟ້າ, ​ເອ​ເລັກ​ໂຕ​ນິກ, ລະບົບ​ນ້ຳ​ປະປາ, ລະບົບ​ນ້ຳ​ເສຍ, ​ເຟີ​ນິ​ເຈີ, ການ​ກໍ່ສ້າງ​ອາຄານ ​ ແລະ ສິ່ງ​ອຳ​ນວຍ​ຄວາມ​ສະດວກ​ທັງໝົດ;
  • ຄຸ້ມ​ຄອງ​ວາງ​ແຜນ​ນຳ​ໃຊ້​ເນື້ອ​ທີ່​ດິນ​ທີ່​ລັດຖະບານ​ມອບ​ໝາຍ​​ໃຫ້​ມະຫາວິທະຍາ​ໄລ ​ສຸພາ​ນຸວົງ​ ໃຫ້​ສອດ ຄ່ອງ​ກັບກົດໝາຍລະບຽບການ​ຄຸ້ມ​ຄອງ​ທີ່​ດິນ ​ແລະ ຜັງ​ເມືອງ.
  • ກວດກາ, ປະ​ເມີນ​ຜົນ, ສະຫຼຸບ ​ແລະ ສ່ອງ​​ແສງ ວຽກ​ງານ​ທີ່​ຕົນ​ຮັບຜິດຊອບ​ລາຍ​ງານ​ຕໍ່​ອະທິການ​ບໍດີຢ່າ​ງເປັນປົກກະຕິ.
  • ໜ້າທີ່ ແລະ ຂອບເຂດສິດພາຍໃນ​​ຫ້ອງການຄຸ້ມຄອງເຄຫາ ແລະ ບໍລິການ
  • ຫົວໜ້າຫ້ອງການ

​        ມີ​ຄວາມ​ຮັບ​ຜິດ​ຊອບ​ຊີ້​ນຳ​ລວມໃນ​ສຶກສາ​ອົບຮົມ​ແນວ​ຄິດ-​ການ​ເມືອງ​, ຄຸນສົມບັດ ທັດສະນະຕ່າງໆ ໃຫ້ມີຄວາມເປັນລະບຽບ​ ແລະ ສອດຄ່ອງກັບການປະຕິບັດກົດໝາຍ​ໃຫ້​ພະນັກງານ ໃນການຄຸ້ມຄອງຂອງຫົວໜ້າຫ້ອງການໃຫ້ກາຍເປັນຄົນ​ທີ່​ມີ​ອຸດົມ​ຄະຕິ​ສັງຄົມ​ນິຍົມ, ມີຫຼັກໝັ້ນການ​ເມືອງ, ມີ​ຄວາມ​ຊື່ສັດ, ມີ​ຄວາມຮັບຜິດຊອບ​ຕໍ່ການປະຕິບັດໜ້າທີ່​ວິຊາ​ສະ​ເພາະ ແລະ ວຽກງານ​ທີ່​ໄດ້​ຮັບມອບໝາຍ​ສຳ​ເລັດ​ຜົນ ຢ່າງມີ​ປະສິດທິພາບ, ສັງ​ລວມ​ແຜນ​, ໂຄ​ງການ​ກ່ຽວ​ກັບ​ການ​ຄຸ້ມ​ຄອງ​​ເຄຫາສະຖານ, ຄຸ້ມ​ຄອງ​ຊັບ​ສິນ​ຂອງ​ລັດ, ຄຸ້ມ​ຄອງການ​ວາງ​ແຜນ​ນຳ​ໃຊ້​ເນື້ອ​ທີ່​ດິນ​ທີ່​ລັດຖະບານ​ມອບ​ໝາຍ​​ໃຫ້​ມະຫາວິທະຍາ​ໄລສຸພາ​ນຸວົງ​ໃຫ້​ສອດຄ່ອງ​ກັບກົດໝາຍລະບຽບການ​ຄຸ້ມ​ຄອງ​ທີ່​ດິນ ​ແລະ ຜັງ​ເມືອງ.

  • ຮອງຫົວໜ້າຫ້ອງການ

​        ມີ​ໜ້າ​ທີ່​​ຮັບ​ຜິດ​ຊອບ​ວຽກ​ງານ​ຕ່າງໆ ຮ່ວມ​ກັບ​ຫົວ​ໜ້າ​ຫ້ອງ​ການ ແລະ​ ໄດ້​ຮັບ​ການມອບ ໝາຍ ໃນ​ການ​ຄຸ້ມ​ຄອງ​ຫ້ອງ​ການໃນ​ກໍ​ລະ​ນີ​ຫົວ​ໜ້າ​ຫ້ອງ​ການບໍ່​ປະ​ຈຳ​ການ.

  • ພະແນກບໍລິຫານ ມີໜ້າທີ່ ແລະ ຂອບເຂດສິດ ດັ່ງນີ້:
  • ເຮັດ​ໜ້າທີ່​ເປັນ​ເລຂານຸການ​ຫ້ອງການ.
  • ຄຸ້ມ​ຄອງ​ເອກະສານ​ຂາ​ເຂົ້າ – ຂາ​ອອກ.
  • ສ້າງ ​ແລະ ປະກອບ​ເອກ​ະສານ​ຕ່າງ​ໆ.
  • ຄຸ້ມ​ຄອງວຽກ​ງານ​ສະ​ຖິ​ຕິ​ຂອງ​ພະ​ນັກ​ງານ​ໃນ​ຫ້ອງ​ການ.
  • ສັງ​ລວມ​ແຜນ​ທີ່​ຄະ​ນະ​ວິ​ຊາ, ຫ້ອງ​ການ, ສູ​ນ, ຫໍ​ສະ​ໝຸດ ແລະ ສະ​ຖາ​ບັນ.
  • ຮັບຜິ​ດຊອບ​ບົດ​ສະຫຼຸບ, ສ້າງ​ແຜນການປະຈຳ​ເດືອນ, ປະຈຳ​​ໄຕ​ມາດ ​ແລະ ປະຈຳ​ປີ;
  • ປະ​ຕິ​ບັດ​ສິດ ແລະ ໜ້າ​ທີ່​ອື່ນໆ​ຕາມ​ການມອບ​ໝາຍ ຂອງ​ຂັ້ນ​ເທິງ.
  • ພະແນກຄຸ້ມຄອງຊັບສິນ ມີໜ້າທີ່ ແລະ ຂອບເຂດສິດ ດັ່ງນີ້:
  • ນຳ​ໃຊ້​ທີ່​ດິນ​ຕາມ​ແຜນ​ແມ່​ບົດ​ຂອງ​ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ​ທີ່​ຖືກ​ເຊັນ​ຮັບ​ຮອງ (ແຜນ​ແມ່​ບົດ ແລະ ກົດ​ລະ​ບຽບ​ກ​ານ​ຄຸ້ມ​ຄອງ​ການ​ນຳ​ໃຊ້​ທີ່​ດິນ ຂອງ​ ມ​ສ ວິ​ທະ​ຍາ​ເຂດ​ບ້ານດອນ​ໃໝ່ ສະ​ບັບ​ເລກ​ທີ 5692/ຍ​ທ​ຂ-ຫຼບ, ລົງ​ວັນ​ທີ 18/10/2018.
  • ຂຶ້ນ​ບັນ​ຊີ​ຊັບ​ສິນ ແລະ ຂຶ້ນ​ທະ​ບຽນ​ຊັບ​ສິນ​ຂອງ​ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ​ໃຫ້​ຄົບ​ຖ້າ​ສົມ​ບູນ​ຕາມ​ເນື້ອ​ໃນ​ການ​ຂຶ້ນ​ທະ​ບຽນ​ຊັບ​ສິນ​ຂອງ​ລັດ.
  • ວາງ​ແຜນ​ການ​ນຳ​ໃຊ້​ຊັບ​ສິນ​ທີ່​ມີ ແລະ ຊັບ​ສິນ​ທີ່​ໄດ້​ຈາກ​ການ​ຊ່ວຍເຫຼືອ​ລ້າ.
  • ປະ​ເມີນມູນ​ຄ່າ​ຊັບ​ສິນ​ປະ​ຈຳ​ປີ.
  • ການ​ຊື້ ແລະ ການ​ສ້າງ​ໃໝ່​ຂອງ​ລັດ​ຖະ​ສົມ​ບັດ, ຕິດ​ຕາມ​ການມອບ-ໂອນ, ການ​ປ່ຽນ​ສິດ​ຄຸ້ມ​ຄອງ​ລັດ​ຖະ​ສົມ​ບັດ.
  • ມີ​ການ​ວາງ​ແຜນ ການ​ຫັນ​ຊັບ​ສິນ​ເປັນ​ທຶນ, ການ​ແລກ​ປ່ຽນ, ການ​ວາງ​ແຜນ​ການ​ໃຫ້​ເຊົ່າ ຫຼື ການ​ສຳ​ປະ​ທານ​ຕ່າງໆ.
  • ດຳ​ເນີນການ​ສຳ​ປະທານທີ່​ດິນ, ການ​ເຊົ່າ​ອາຄານ​ສະຖານ​ທີ່ຂອງ​ນັກທຸລະກິດ​ ທີ່​ຈະ​ເຂົ້າມາ​ມີ​ສ່ວນ​ຮ່ວມ​ໃນ​ການ​ພັດທະນາມະຫາວິທະຍາ​ໄລ​ສຸພາ​ນຸວົງ ​ໃຫ້​ສອດຄ່ອງ​ຕາມ​ລະບຽບກົດໝາຍວ່າ​ດ້ວຍ​ຊັບ​ສິນ​ຂອງ​ລັດ ສະບັບ​ເລກທີ 09/ສພຊ; ລົງ​ວັນ​ທີ 12/10/2002 ​​.
  • ປະ​ຕິ​ບັດ​ໜ້າ​ທີ່ ແລະ ສິດ ອື່ນໆ ຕາມ​ການມອບ​ໝາຍ​ ຂອງ​ຂັ້ນ​ເທິງ.
  • ພະແນກກໍ່ສ້າງສ້ອມແປງ ມີໜ້າທີ່ ແລະ ຂອບເຂດສິດ ດັ່ງນີ້:
  • ວາງ​ແຜນ​ຍຸດ​ທະ​ສາດກ່ຽວກັບ​ການ​ປະຕິບັດວຽກງານ​ຂອງ​ພະ​ແນ​ກ​ໃຫ້​ສອດຄ່ອງ​ກັບ​ທິດ​ທາງ​ຊີ້ນຳ​ໆພາ​ຂອງ​ຫ້ອງການ​ກໍ່ຄື​ຂອງ ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ.
  • ສຳຫຼວດ, ອອກ​ແບບ, ຄິດ​ໄລ່​, ປະ​ເມີນ​ລາຄາ​ການກໍ່ສ້າງ ​ແລະ​ ສ້ອມ​ແປງ​ໃຫ້​ສອດຄ່ອງ​ຕາມ​ລະບຽບ​ແລະ ຫຼັກການ​ອອກ​ແບບ​ທີ່​ວາງ​ອອກ​ຢ່າງຊັດ​ເຈນ.
  • ຕິດຕາມ​ການ​ປະຕິບັດ​ສັນຍາ​ຮັບ​ເໝົາການກໍ່ສ້າງ.
  • ສ້ອມ​ແປງ​ຕາມ​ທີ່ມະຫາວິທະຍາ​ໄລ​ໄດ້​ພິຈາລະນາ​ແລ້ວ​ ກ່ຽວກັບ​ການ​ຕິດ​ຕັ້ງລະບົບ​ໄຟຟ້າ, ນ້ຳປະປາ, ອຸປະກອນ​ໄຟຟ້າ​-​ເອ​ເລັກ​ໂທ​ນິກ ແລະ ​ສິ່​ງອຳນວຍ​ຄວາມ​ສະດວກ​ຕ່າງໆ.
  • ຄຸ້ມ​ຄອງ​ການ​ນຳ​ໃຊ້​ໄຟ​ຟ້າ-ນ້ຳ​ປະ​ປາ ທົ່ວ ມະ​ຫາ​ວິ​ທະ​ຍາ​ໄລ​ສຸ​ພາ​ນຸ​ວົງ.
  • ປະ​ຕິ​ບັດ​ຕາມ​ນະ​ໂຍ​ບາຍ​ກ່ຽວ​ກັບ​ການກໍ່​ສ້າງ, ຫຼັກ​ການ​ກ່ຽວ​ກັບ​ການກໍ່​ສ້າງ, ການ​ປະ​ຕິ​ບັດ​ພັນ​ທະ​ຂອງ​ພົນ​ລະ​ເມືອງ​ກ່ຽວ​ກັບ​ວຽກ​ງານກໍ່​ສ້າງ​ຕະຫຼອດ​ເຖິງ​ການ​ຮ່ວມ​ມື​ສາ​ກົນ​ໂດຍ​ອີງ​ໃສ່​ປະ​ເພດລັກ​ສະ​ນະ​ຂອງ​ການກໍ່​ສ້າງ, ຂະ​ໜາດ​ຂອງ​ການກໍ່​ສ້າງ, ປະ​ຕິ​ບັດ​ຕາມ​ກຳ​ນົດ​ໝາຍ​ທາງ​ດ້ານ​ເຕັກ​ນິກ, ມາດ​ຕະ​ຖານ​ເຕັກ​ນິກ ຕະຫຼອດ​ເຖິງ​ລາ​ຄາ​ຫົວ​ໜ່ວຍ​ການກໍ່​ສ້າງ​ຢ່າງ​ເຂັ້ມ​ງວດ.