ການເງີນ

ຈຸດປະສົງ
ຂໍ້ຕົກລົງສະບັບນີ້ກຳນົດທີ່ຕັ້ງ, ພາລະບົດບາດ, ຫນ້າທີ່, ຂອບເຂດສິດ, ໂຄງປະກອບການຈັດຕັ້ງ, ລະບອບແບບແຜນວິທີເຮັດວຽກ ເພື່ອ​ເປັນບ່ອນອີງທາງດ້ານນິຕິກຳ ໃຫ້ແກ່ການຈັດຕັ້ງ ແລະ ເຄື່ອນໄຫວ ຂອງຫ້ອງການ ການເງິນ ໃນການປະຕິບັດແຜນພັດທະນາ ຂອງ ມະຫາວິທະຍາໄລ ສຸພານຸວົງ, ແຜນຍຸດທະສາດໃນການພັດທະນາຊັບພະຍາກອນມະນຸດ ໃຫ້ສອດຄ່ອງກັບແນວທາງນະໂຍບາຍຂອງພັກ ແລະ ລະບຽບກົດຫມາຍຂອງລັດ. ​

ທີ່ຕັ້ງ ແລະ ພາລະບົດບາດ
ຫ້ອງການ ການເງິນຂຽນ​ຫຍໍ້ ‘’ກງ’’​ເປັນ​ກົງຈັກ​ດ້ານ​ບໍລິຫານ, ມີພາລະບົດບາດເປັນເສນາທິການໃຫ້ແກ່ອະທິການບໍດີດ້ານວຽກງານຫ້ອງການ ການເງິນ, ເປັນໃຈກາງໃນການປະສານງານດ້ານວຽກງານການເງິນກັບບັນດາຄະນະວິຊາ, ຫ້ອງການ, ການຈັດຕັ້ງຕ່າງໆ ຢູ່ພາຍໃນມະຫາວິທະຍາໄລສຸພາ​ນຸວົງ ແລະ ພາກສ່ວນຕ່າງໆທີ່ກ່ຽວຂ້ອງ.
ຫນ້າທີ່ ແລະ ຂອບເຂດສິດ
ຫນ້າທີ່
ຫ້ອງການ ການເງິນມີຫນ້າ​ທີ່​ດັ່ງນີ້:

  • ສຶກສາອົບຮົມດ້ານການເມືອງ-ແນວຄິດ, ຄຸນສົມບັດ ແລະ ລະບຽບກົດຫມາຍຕ່າງໆໃຫ້ແກ່ພະນັກງານ, ພາຍໃນຫ້ອງການ ການ​ເງິນໃຫ້ເປັນພົນລະເມືອງດີຂອງຊາດ;
  • ຈັດ​ຕັ້ງ​ຜັນ​ຂະຫຍາຍ​ດຳລັດ, ຂໍ້​ກຳນົດ, ມະຕິຄຳສັ່ງ, ລະບຽບຫຼັກການຕ່າງໆ ກ່ຽວກັບການເງິນ ແລະ ຊັບສິນຂອງລັດ, ສ້າງລະບົບກົນໄກໃຫ້ມີປະສິດທິຜົນ;
  • ສ້າງແຜນງົບປະມານປະຈຳປີ, ປະຈຳງວດ, ແຜນລາຍຮັບ, ລາຍຈ່າຍ ແລະ ເງິນລາຍຮັບວິຊາການ ຂອງມະຫາວິທະຍາໄລ ສຸພານຸວົງ;
  • ຈັດສັນງົບປະມານປະຈຳປີ ທີ່ໄດ້ຮັບອະນຸມັດ ຈາກລັດຖະບານຕາມລະບຽບຫຼັກການ;
  • ຕິດຕາມ, ກວດກາການປະຕິບັດແຜນລາຍຮັບ-ລາຍຈ່າຍງົບປະມານ, ການຄຸ້ມຄອງຊັບສິນ ຂອງລັດ ຕາມບັນດາຫົວໜ່ວຍການເງິນຕ່າງໆ;
  • ຄົ້ນຄວ້າ, ວາງແຜນ, ສ້າງຂໍ້ກຳນົດ, ບົດແນະນຳວິຊາການດ້ານມະຫາພາກກ່ຽວກັບວຽກງານ ບໍລິຫານດ້ານການເງິນຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ;
  • ຮັບຜິດຊອບສັງລວມ, ກວດກາ, ປະເມີນຜົນ, ສະຫຼຸບ ແລະ ລາຍງານໃຫ້ການຈັດຕັ້ງຂັ້ນເທິງ ທີ່ກ່ຽວຂ້ອງ ເປັນແຕ່ລະໄລຍະ;
  • ປະຕິບັດຫນ້າທີ່ອື່ນໆຕາມການມອບຫມາຍຂອງຂັ້ນ​ເທິງ.

ຂອບເຂດສິດ
ຫ້ອງການ ການເງິນ ມີຂອບເຂດສິດດັ່ງນີ້:

  • ສັງລວມ, ສະຫຼຸບ ແລະ ລາຍງານທຸກການເຄື່ອນໄຫວດ້ານວຽກງານການເງິນຂອງມະຫາວິທະຍາໄລ ສຸພານຸວົງ ໃຫ້ການຈັດຕັ້ງຂັ້ນເທິງຊາບ ເປັນແຕ່ລະໄລຍະ;
  • ສະເໜີງົບປະມານ, ນຳໃຊ້ງົບປະມານ, ແຫຼ່ງລາຍຮັບດ້ານວິຊາການ, ແຫຼ່ງທຶນຕ່າງໆໃຫ້ຖືກຕ້ອງຕາມເປົ້າ ໝາຍທີ່ຕົນຮັບຜິດຊອບ;
  • ຮ່ວມມືດ້ານວິຊາການການເງິນກັບທຸກອົງການຈັດຕັ້ງສັງຄົມທັງພາຍໃນ ແລະ ພາຍນອກຕາມການ ມອບໝາຍ;
  • ປະຕິບັດສິດອື່ນໆຕາມການມອບຫມາຍຂອງຂັ້ນ​ເທິງ.

ໂຄງປະກອບການຈັດຕັ້ງ
ໂຄງປະກອບກົງຈັກ
ຫ້ອງການ ການເງິນ ມີ​ໂຄງ​ປະກອບ​ກົງຈັກດັ່ງນີ້:

  • ພະແນກ ຄັງເງິນ;
  • ພະແນກ ບັນຊີ-ງົບປະມານ;
  • ພະແນກ ກວດກາການເງິນ-ສະໜອງວັດຖຸ;.

ໂຄງປະກອບບຸກຄະລາກອນ
ຫ້ອງການ ການ​ເງິນ ປະກອບດ້ວຍ ຫົວຫນ້າຫ້ອງການ 1 ທ່ານ, ຮອງຫົວຫນ້າຫ້ອງການ​ 1 ທ່ານ, ຫົວຫນ້າພະແນກ 1 ທ່ານ, ຫົວຫນ້າຂະແໜງ 1 ທ່ານ ແລະ ພະນັກງານວິຊາການຈຳນວນ​ໜຶ່ງ ທີ່ຖືກແຕ່ງຕັ້ງຕາມລະບຽບການ.
ຫນ້າທີ່ ແລະ ຂອບເຂດສິດຂອງຫົວຫນ້າ ແລະ ຮອງຫົວຫນ້າຫ້ອງການ

  • ຫົວໜ້າຫ້ອງການມີຄວາມຮັບຜິດຊອບໃນການປະຕິບັດໜ້າທີ່ ແລະ ຂອບເຂດສິດ ທີ່ໄດ້ກຳນົດໄວ້ໃນມາດຕາ 3 ແລະ ມາດຕາ 4 ຂອງຂໍ້ຕົກລົງສະບັບນີ້;
  • ຮອງຫົວໜ້າຫ້ອງການມີຫນ້າທີ່ຊ່ວຍຮັບຜິດຊອບວຽກງານຕ່າງໆຕາມການມອບຫມາຍ;
  • ໃນກໍລະນີຫົວຫນ້າບໍ່ຢູ່, ຮອງຫົວຫນ້າຫ້ອງການ ມີສິດບໍລິຫານວຽກງານດ້ານ ຕ່າງໆ ຕາມການມອບຫມາຍ ເປັນລາຍລັກອັກສອນ.

ຫນ້າທີ່ ແລະ ຂອບເຂດສິດຂອງພະແນກ
 ຫນ້າທີ່ ແລະ ຂອບເຂດສິດຂອງແຕ່ລະພະແນກ

  • ພະແນກຄັງເງິນສົດ: ມີຫນ້າທີ່ແລະຂອບເຂດສິດດັ່ງນີ້:
  • ຮັບຜິດຊອບໃນການຄຸ້ມຄອງເງິນສົດ ແລະ ຮັບຜິດຊອບເບີກຈ່າຍ;
  • ຄຸ້ມຄອງກວດກາເອກະສານຄ້ຳປະກັນຕ່າງໆ ຕາມການມອບໝາຍ;
  • ລົງບັນຊີລາຍຮັບ, ລາຍຈ່າຍ ປະຈຳວັນ ທຸກໆແຫຼ່ງທຶນ;
  • ສະຫຼຸບສັງລວມລາຍຮັບ-ລາຍຈ່າຍ ປະຈຳອາທິດ, ເດືອນ, ງວດ ແລະ ປີ;
  • ສົມທົບກັບພາກສ່ວນກ່ຽວຂ້ອງ ເພື່ອສົມທຽບຕົວເລກລາຍຮັບ-ລາຍຈ່າຍຂາດຕົວຂອງຮ່ວງ ເງິນຕ່າງໆ;
  • ຕິຕາມ, ແນະນຳ, ຊຸກຍູ້, ກວດກາ ແລະ ຄຸ້ມຄອງດ້ານວິຊາການ ໃນການລົງບັນຊີ ລາຍ ຮັບ-ລາຍຈ່າຍເງິນສົດ ໃຫ້ບັນດາຫົວໜ່ວຍການເງິນຕ່າງໆ;
  • ປະຕິບັດຫນ້າທີ່ ແລະ ສິດອື່ນໆ ຕາມການມອບຫມາຍຂອງຂັ້ນ​ເທິງ.
  • ພະແນກບັນຊີ-ງົບປະມານ ມີຫນ້າທີ່ ແລະ ຂອບເຂດສິດ ດັ່ງນີ້:
  • ຮັບຜິດຊອບການສຳລະບັນຊີ ໃຫ້ແກ່ຜູ້ສະໜອງ;
  • ຕິດຕາມການລົງບັນຊີລາຍຮັບ, ລາຍຈ່າຍປະຈຳວັນ ຂອງທຸກແຫຼ່ງທຶນ;
  • ສະຫຼຸບລາຍຮັບ, ລາຍຈ່າຍປະຈຳວັນ, ອາທິດ, ເດືອນ, ງວດ ແລະ ປີ;
  • ຊຸກຍູ້, ກວດກາ ແລະ ຄຸ້ມຄອງດ້ານວິຊາການ ໃນການລົງບັນຊີລາຍຮັບ, ລາຍຈ່າຍ ຂອງແຕ່ລະຫົວໜ່ວຍການເງິນ ກັບຄວາມຮັບຜິດຊອບຂອງຕົນ;
  • ປະສານສົມທົບກັບບັນດາຫົວໜ່ວຍການເງິນຕ່າງໆ ແລະ ພະແນກຄັງເງິນສົດ ເພື່ອສົມທຽບ ຕົວເລກລາຍຮັບ, ລາຍຈ່າຍງົບປະມານຂາດຕົວ;
  • ລາຍງານການເງິນແຕ່ລະໂຄງການປະຈຳປີ ແລະ ສົມທົບກັບອົງການກວດສອບບັນຊີທ້າຍປີ;
  • ວາງແຜນໃນການຄຸ້ມຄອງງົບປະມານ, ການເງິນ ໃນທຸກໆແຫຼ່ງທຶນ;
    • ສ້າງແຜນ, ຈັດສັນ, ສັງລວມງົບປະມານລາຍຮັບ, ລາຍຈ່າຍ ຈາກທຸກແຫຼ່ງທຶນ;
    • ປະຕິບັດຫນ້າທີ່ ແລະ ສິດອື່ນໆ ຕາມການມອບຫມາຍຂອງຂັ້ນ​ເທິງ.

ພະແນກກວດກາການ​ເງິນ ສະໜອງວັດຖຸ: ມີໜ້າທີ່ ແລະ ຂອບເຂດສິດດັ່ງນີ້:

  • ວາງແຜນຄຸ້ມຄອງການກວດກາ ແຫຼ່ງທຶນ ຂອງຫົວໜ່ວຍການເງິນຕ່າງໆ;
  • ຕິດຕາມ, ກວດກາ, ຊຸກຍູ້ປະຕິບັດລາຍຮັບ, ລາຍຈ່າຍງົບປະມານ-ການເງິນ ເງິນສົດຈາກ ທຸກແຫຼ່ງທຶນ ຂອງທຸກຫົວໜ່ວຍການເງິນ ຕາມລະບຽບຫຼັກການ;
  • ກວດກາຂໍ້ມູນດ້ານການເງິນເຊັ່ນ: ຈຳນວນພົນ, ຊັບສິນ-ວັດຖຸອຸປະກອນ ທີ່ຂື້ນກັບສະຖາບັນ;
  • ສ້າງປື້ມຄູ່ມື ແລະ ຂໍ້ແນະນຳດ້ານວິຊາການ ທີ່ມີລັກສະນະມະຫາພາກ;
  • ວາງແຜນໃນການຄຸ້ມຄອງຊັບສິນ, ວັດສະດຸ-ອຸປະກອນ, ການຈັດຊື້, ຈັດຈ້າງ ແລະ ບໍລິການອື່ນໆ;
  • ຄຸ້ມ​ຄອງ ​ແລະ ບໍລິຫານຫ້ອງການ;
  • ປະຕິບັດໜ້າທີ ແລະ ສິດອື່ນໆ ຕາມການມອບໝາຍ.

ລະບອບແບບແຜນວິທີເຮັດວຽກ ແລະ ການພົວພັນປະສານງານ
ມາດຕາ 9.  ແບບແຜນວິທີເຮັດວຽກ
ຫ້ອງການ ການເງິນ ເຄື່ອນໄຫວຕາມລະບຽບຫລັກການ ດັ່ງນີ້ :
–   ເຮັດວຽກຕາມຫລັກການລວມສູນປະຊາທິປະໄຕ,  ນຳພາເປັນໝູ່ຄະນະ, ບຸກຄົນຮັບຜິດຊອບ ແລະປະຕິບັດລະບອບຫົວຫນ້າດຽວ;
–   ທຸກການເຄື່ອນໄຫວ ແລະ ດຳເນີນງານຂອງຫ້ອງການ ການເງິນ ແມ່ນອີງໃສ່ທິດທາງແຜນການລວມຂອງມະຫາວິທະຍາໄລສຸພານຸວົງ, ບົນພື້ນຖານແນວທາງນະໂຍບາຍຂອງພັກແລະລະບຽບກົດໝາຍລັດ;
–  ປະຕິບັດລະບອບປະຊຸມ,ຖອດຖອນບົດຮຽນ,ກວດກາ-ປະເມີນຜົນ,ສະຫຼຸບແລະລາຍງານຕາມລະບຽການ.
ການພົວພັນປະສານງານ

  • ຫ້ອງການ ການເງິນ ມີສິດພົວພັນ-ປະສານງານໂດຍກົງກັບບັນດາຫ້ອງການ, ຄະນະວິຊາ, ສູນ, ຫໍສະໝຸດວາງແຜນໃນການຄຸ້ມຄອງຊັບສິນ, ວັດສະດຸ-ອຸປະກອນ, ການຈັດຊື້, ຈັດຈ້າງ ແລະ ບໍລິການອື່ນໆ;
  • ຄຸ້ມ​ຄອງ ​ແລະ ບໍລິຫານຫ້ອງການ; ພາຍໃນມະຫາວິທະຍາໄລ ສຸພານຸວົງ;

– ພົວພັນ ແລະ ປະສານງານ ທາງດ້ານການເງິນກັບພາກສ່ວນຕ່າງໆທີ່ກ່ຽວຂ້ອງ ທັງພາກລັດ ແລະ ເອກະຊົນ, ຕາມລະບຽບການ.